Эрүүл мэндийн яам - Монгол улсын засгийн газар

Долоо хоногийн онцлох

Шинэ мэдээ мэдээлэл

“Нийслэлийн Хүрээ амаржих газрын 2020-2024 оны Хөгжлийн хөтөлбөр”-ийг танилцууллаа

Нийслэлийн Хүрээ амаржих газрын дарга А.Жаргал Хүрээ амаржих газрын 2020-2024 оны Хөгжлийн хөтөлбөр”-ийг өнөөдөр буюу 2020 оны 10-р сарын 30-ны өдөр Эрүүл мэндийн сайд, ЭМЯ-ны бүрэлдэхүүн, салбарын лавлагаа шатлалын байгууллагуудын удирдлагуудад танилцууллаа.

“Нийгмийн эрүүл мэндийн үндэсний төвийн 2020-2024 оны Хөгжлийн хөтөлбөр”-ийг танилцууллаа

Нийгмийн эрүүл мэндийн үндэсний төвийн Ерөнхий захирал Д.Нарантуяа “Нийгмийн эрүүл мэндийн үндэсний төвийн 2020-2024 оны Хөгжлийн хөтөлбөр”-ийг өнөөдөр буюу 2020 оны 10-р сарын 29-ний өдөр Эрүүл мэндийн сайд, ЭМЯ-ны бүрэлдхүүн, салбарын лавлагаа шатлалын байгууллагуудын удирдлагуудад танилцууллаа. Оролцоонд тулгуурласан Нийгмийн эрүүл мэндийн цогц тусламж үйлчилгээний чанар хүртээмжийг сайжруулах замаар Монгол хүний дундаж наслалтыг уртасгах зорилгод хүрэхийн тулд цаашид хэрэгжүүлэх үндсэн чиглэлүүдийг Нийгмийн эрүүл мэндийн үндэсний төвийн 2020-2024 оны Хөгжлийн хөтөлбөрт тодорхойлон тусгасан байна. Үүнд, эрүүл мэндийн нөлөөллийн үнэлгээг тогтмолжуулах, тандалтын тогтолцоог сайжруулах, Нийгмийн эрүүл мэндийн тусламж үйлчилгээний хуулийн төслийг боловсруулахад нотолгоонд суурилсан судалгааны баримтуудыг бүрдүүлэн ажиллах болон бусад чухал зорилтууд тусгагдсан байна. НЭМҮТ-ийн 2020-2024 оны Хөгжлийн хөтөлбөрийн танилцуулгыг сонссоны дараа СБД-ийн Нэгдсэн эмнэлгийн дарга С.Чимэгээ хүүхдийн амны хөндийн эрүүл ахуйг сайжруулахад хэрхэн анхаарах, ЭХЭМҮТ-ийн Ерөнхий захирал Ш.Энхтөр хүүхдийн эрт илрүүлгийн товлолтой болох, тандалтын тогтолцоог хөгжүүлэх талаар санал дэвшүүлэв. Эрүүл мэндийн сайдын зөвлөх О.Чимидсүрэн Нийгмийн эрүүл мэндийн тандалт, тусламж үйлчилгээний тогтолцоог хөгжүүлснээр 2024 онд хүрэх түвшинг тодорхойлж, үндсэн 7 чиглэлээр интервенци хийхээр Засгийн газрын хөтөлбөрт тусгагдсаны дагуу Нийгмийн эрүүл мэндийн тусламж үйлчилгээг эрчимжүүлэн ажиллах шаардлагатай гэдгийг чухалчлав. Эрүүл мэндийн сайд Т.Мөнхсайхан, Эрүүл мэндийн тухай хуулинд Нийгмийн эрүүл мэндийн тусламж үйлчилгээ нь тэргүүлэх чиглэл байна хэмээн тусгагдсаны дагуу Нийгмийн эрүүл мэндийн төвийн стандартыг нэн даруй батлан гаргаж, Нийгмийн эрүүл мэндийн тусламж үйлчилгээний санхүүжилтийг нэмэгдүүлэн ажиллана хэмээн онцлон хэлэв.

ЭМЯ-НЫ ДЭРГЭДЭХ ЭМНЭЛГИЙН МЭРГЭЖИЛТНИЙ ЁС ЗҮЙН ХЯНАЛТЫН ХОРООНЫ ДАРГА ОРХОН АЙМАГТ АЖИЛЛАЛАА

ЭМЯ-аас “Эерэг хандлага-Эмчилгээний эхлэл” 3 сарын аян зохион байгуулж байгаатай холбогдуулан ЭМЯ-ны дэргэдэх эмнэлгийн мэргэжилтний ёс зүйн хяналтын хорооны дарга, АШУҮИС-ийн ахлах багш, анагаах ухааны доктор, хуульч, өмгөөлөгч М.Цэрэнбат Орхон аймгийн эрүүл мэндийн салбар байгууллагуудын эмнэлгийн мэргэжилтний ёс зүйн салбар баг, хорооны үйл ажиллагаатай танилцан арга зүйн зөвламж өгч ажиллалаа. Тэрээр Орхон аймагт ажиллах хугацаандаа Аймгийн Засаг даргын орлогч А.Түвшинжаргалтай уулзаж эмч, эмнэлгийн ажилчдын эерэг хандлага, эрүүл мэндийн байгууллагаар үйлчлүүлэгчдийн соёлыг хэрхэн нэмэгдүүлж ажиллах талаар санал солилцож, эмнэлгийн мэргэжилтний ёс зүйн хороо болон эмнэлгийн мэргэжилтнүүдийн мэдлэг чадвар, соён гэгээрүүлэх үйл ажиллагааг орон нутгаас сайн дэмжиж ажилладагт нь талархал илэрхийллээ. Мөн М.Цэрэнбат дарга эрүүл мэндийн байгууллагуудын эмч, эмнэлгийн ажилтнуудад “АНАГААХ УХААНЫ ЭРХ ЗҮЙ, ЭМНЭЛГИЙН МЭРГЭЖИЛТНИЙ ЁС ЗҮЙН ДҮРЭМ” сэдвээр сургалт зохион байгуулж нийт 155 эрүүл мэндийн ажилтнууд оролцлоо.

Эх хүүхдийн эрүүл мэндийн үндэсний төвийн зөвлөх эмч нарын баг орон нутагт ажиллаж байна

Жил бүрийн томуу, томуу төст өвчин (ТТТӨ)-ий дэгдэлтийн улирлыг угтуулан ЭХЭМҮТ-өөс томуу, томуу төст өвчний оношилгоо, эмчилгээний удирдамжийг шинэчлэн боловсруулж, улсын хэмжээнд хүүхдэд тусламж үйлчилгээ үзүүлж буй хүүхдийн эмч, мэргэжилтнүүдэд зориулан сургалт зохион байгуулах, тусламж үйлчилгээний бэлэн байдлыг үнэлж, зөвлөгөө өгөх зэргээр хамтран ажилладаг уламжлалтай. 2020 оны хувьд ТТТӨ-ий улирал нь КОВИД-19 ба бусад халдваруудтай хавсарч тохиолдох эрсдэл өндөртэй, ихээхэн онцлогтой улирал болохоор байгаа тул бэлтгэл ажлыг илүү хянуур, нарийн төлөвлөж хийх шаардлага бидний өмнө тулгарч байна. Иймд тус төв нь ЭМЯ, ДЭМБ-тай хамтран 21 аймгийн Нэгдсэн эмнэлэг, Бүсийн оношилгоо эмчилгээний төвийн ТТТӨ-ний дэгдэлтийн үед хүүхдэд үзүүлэх эмнэлгийн тусламж үйлчилгээний бэлэн байдал, Эрүүл мэндийн сайдын холбогдох тушаалын хэрэгжилтийг үнэлж, зөвлөгөө өгөн ажиллаж байна. Энэ ажлын хүрээнд ЭХЭМҮТ-ийн нярайн зөвлөх, АУ-ны магистр, клиникийн профессор, тэргүүлэх зэргийн эмч С.Энхтуяагаар ахлуулсан зөвлөх эмч нарын баг Өмнөговь аймгийн Бүсийн оношилгоо эмчилгээний төв, Дундговь аймгийн Нэгдсэн эмнэлэгт ажиллаж, хүүхдийн яаралтай тусламж, эрчимт эмчилгээний бэлэн байдал, нярайн түнхний хэт авиан скрининг оношилгоо, эмчилгээний хэрэгжилтийн бодлогын бичиг баримт, эмнэлзүйн заавар, хүний нөөц, эм, эмнэлгийн хэрэгсэл, тоног төхөөрөмжийн хангамж, бэлэн байдлыг шалгуур үзүүлэлтээр үнэлэн, сургалт зохион байгуулж, аймаг тус бүрд зөвлөмжийг хүргүүлж, мэргэжил аргазүйгээр ханган ажиллалаа. Жил бүрийн ТТТӨ-ий улирлын бэлтгэл ажилд дэмжлэг үзүүлж, хамтран ажилладаг ДЭМБ-ын Монгол дах төлөөлөгчийн газарт талархал илэрхийлье.

1800-0119 дуудлагын төв

Эмнэлгийн үзлэгийн цаг захиалгын 1800-0119 дуудлагын төв ашиглалтад орсноос хойш дээрх үйлчилгээг авахаар эмнэлэгт биеэр ирдэг хүмүүсийн тоо 86 хүртэл хувиар буурсан байна. Харин зарим эмнэлгүүд дээр ачаалал төдийлөн буураагүй байна. Тиймээс ард иргэд эмнэлэгт ирэхийг урьтал болголгүйгээр зайнаас авах үйлчилгээний боломжуудыг ашиглахыг эмч нар зөвлөж байна.

Монголын мэс засалч эмч нарын ХIII чуулга уулзалт манай аймагт болж өндөрлөлөө

Монголын мэс засалч эмч нарын ХIII чуулга уулзалт 2020 оны 10-р сарын 23-24-ний өдөр Орхон аймагт амжилттай зохион байгуулагдаж нийслэл, орон нутгийн төлөөлөл болсон нийт 280 гаруй мэс засалч эмч нар оролцлоо. “Монголын мэс заслын тулгамдсан асуудлууд 2020” нэрийн дор зохион байгуулагдаж буй энэ удаагийн чуулганд мэс засалч эмч нар өөрсдийн ололт амжилт, алдаа оноог дүгнэн хэлэлцэж, шинэ технологи, дэлхийн мэс заслын чиг хандлагын талаар зөвлөлдөв. Чуулганд нийслэл, орон нутгийн төлөөлөл болсон нийт 280 гаруй мэс засалч эмч нар оролцлоо. Чуулганы нээлтийн арга хэмжээнд Монгол Улсын Хөдөлмөрийн Баатар, Ардын эмч Анагаахын шинжлэх ухааны доктор профессор, академич Н.Баасанжав, Монгол Улсын хөдөлмөрийн баатар, Төрийн шагналт Г.Нямхүү, дэлхийн шилдэг мэс засалч, Монгол Улсын хүний гавьяат эмч, анагаахын шинжлэх ухааны доктор О.Сэргэлэн, Монгол Улсын Ардын эмч, хүний гавьяат эмч Цэдэн-Иш, УИХ-ын гишүүн, Монгол Улсын хүний гавьяат эмч Ж.Чинбүрэн болон Орхон аймгийн Засаг даргын орлогч С.Батжаргал, Орхон аймгийн БОЭТ-ийн дарга Б.Батсүх, аймгийн Эрүүл мэндийн газрын дарга Д.Сүхээ нар оролцлоо. Орхон аймгийн Засаг даргын орлогч С.Батжаргал нээлтийн арга хэмжээний үеэр тус үйл ажиллагааг зохион байгуулахад орон нутаг 5 сая төгрөгийн дэмжлэг үзүүлж буйгаа хэлсэн юм. Ахмад үеэсээ суралцаж, ёс зүй, харилцаа хандлагаа улам бүр сайжруулж, ажилдаа судалгаатай байж, онолын мэдлэгээ байнга дээшлүүлж байх нь зүйтэй талаар Монголын мэс засалч эмч нарын холбооны ерөнхийлөгч Монгол Улсын хөдөлмөрийн баатар Ардын эмч Анагаахын шинжлэх ухааны доктор профессор, академич Н.Баасанжав нээлтийн үеэр хэлсэн үгэндээ дурдлаа. Түүнчлэн хот хөдөөгийн мэс засалчдын ур чадварын ялгааг арилгах, хамтран ажиллах бодлого төлөвлөлтийг боловсруулах тал дээр анхаарах нь зүйтэй гэдгийг онцоллоо.

ТӨСӨЛД САНАЛ АВЧ БАЙНА