Цаг үеийн мэдээ

Цаг үеийн мэдээ

“Арьсны Өвчин Судлалын Үндэсний Төв”-ийн Төлөөлөн удирдах зөвлөлд гишүүнээр ажиллах олон нийтийн төлөөллийг сонгон шалгаруулах материал хүлээн авах тухай

“Арьсны Өвчин Судлалын Үндэсний Төв”-ийн Төлөөлөн удирдах зөвлөлд гишүүнээр ажиллах олон нийтийн төлөөллийг сонгон шалгаруулах материал хүлээн авах тухай

“Арьсны Өвчин Судлалын Үндэсний Төв”-ийн Төлөөлөн удирдах зөвлөлд гишүүнээр ажиллах олон нийтийн төлөөллийг сонгон шалгаруулах материал хүлээн авах тухай

Өвөрхангай аймаг

Өвөрхангай аймаг "9 зөвийн зарчмыг эрхэмлэе" уриан дор эрүүл мэндийн тусламж үйлчилгээний ээлтэй орчинг хөгжүүлнэ

Өвөрхангай аймгийн Эрүүл мэндийн газраас эрүүл мэндийн байгууллагуудын үйлчилгээний соёлыг сайжруулах, ээлтэй орчинг хөгжүүлэх зорилгоор "Есөн зөвийг эрхэмлэе" уриатай, 9 зөвийн зарчмыг томъёолж үйлчилгээндээ мөрдүүлэхээр боллоо. Энэ ажлын хүрээнд Эрүүл мэндийн газрын А/26 тоот тушаал батлагдаж эрүүл мэндийн байгууллагуудад хүргүүлж, хэрэгжүүлж эхэллээ. 9 зөвийн үйлчилгээнд: хандлага угталт үйлчилгээ оношилгоо эмчилгээ сувилгаа үдэлт зөвлөгөө хяналтыг зөв гүйцэтгэх үйлчилгээний журмыг мөрдүүлж эхэлсэнээр эмч, мэргэжилтний ёс зүй, харилцаа хандлага, эрүүл мэндийн тусламж үйлчилгээний ээлтэй байдал сайжирч, иргэдийн сэтгэлд нийцтэл ажиллах ёстой болж байгаа юм.

Мориноос унаж бэртсэн хүүг ГССҮТ-д авчирлаа

Мориноос унаж бэртсэн хүүг ГССҮТ-д авчирлаа

Завхан аймгийн Түдэвтэй сумын 90 жилийн ойн баяр наадмын их насны морины уралдаанд морь унаж байсан 13 настай унаач хүү Л.Баасандорж мориноос унаж,тархины суурь ясны хугарал, няцрал оноштойгоор Түдэвтэй сумын эмнэлэгт хэвтэн эмчлүүлж байсан. Өчигдөр Завхан аймгийн Нэгдсэн эмнэлгийн гэмтлийн эмч, сэхээний эмч нарын баг Түдэвтэй суманд очиж үзлэг, оношилгоог хийж, Гэмтэл согог судлалын үндэсний төвийн эмч нартай цахимаар холбогдож зөвлөгөө өгч эмчилгээг үргэлжлүүлсэн. Түүнийг Гэмтэл согог судлалын үндэсний төвийн эмч нарын баг өнөөдөр буюу 7 дугаар сарын 22 ны өдөр ''Блю скай'' компаний онгоцоор тээвэрлэн 19 цаг 10 минутанд Улаанбаатарт авчирч ГССҮТ-д хэвтүүлэн эмчилгээг үргэлжлүүлж байна.

Эрүүл мэндийн сайд А.Цогцэцэг Давид Варбуртоныг хүлээн авч уулзлаа

Эрүүл мэндийн сайд А.Цогцэцэг Давид Варбуртоныг хүлээн авч уулзлаа

Эрүүл мэндийн сайд А.Цогцэцэг, Эрүүл мэндийн яамны Эмнэлгийн тусламжийн газрын дарга Я.Буянжаргал нар АНУ-ын Өмнөд Калифорнийн болон Лос-Анжелес хотын Хүүхдийн эмнэлгийн профессор, Сабанийн эрдэм шинжилгээний институтийн Хүрээлэн буй орчны хүрээлэнгийн захирал Давид Варбуртоныг хүлээн авч уулзлаа. Доктор Давид Варбуртон 2000 оноос эхлэн монгол улсын эрүүл мэндийн салбартай хамтран ажиллаж эхэлсэн бөгөөд Эх хүүхдийн эрүүл мэндийн үндэсний төвтэй хамтран агаарын бохирдол дутуу төрөлт, зулбалтад хэрхэн нөлөөлж буй талаар судалгааг хийж, өгүүллийг олон улсын нэр хүндтэй сэтгүүлд хэвлүүлжээ.

Эрүүл мэндийн сайд А.Цогцэцэг Сингапурын “SingHealth” группын төлөөлөгчдийг өнөөдөр хүлээн авч уулзлаа

Эрүүл мэндийн сайд А.Цогцэцэг Сингапурын “SingHealth” группын төлөөлөгчдийг өнөөдөр хүлээн авч уулзлаа

Эрүүл мэндийн сайд А.Цогцэцэг өнөөдөр Сингапур Улсын эмнэлгүүдийн томоохон групп болох “SingHealth”-ийн Гадаад харилцааны газрын захирал ноён Чуа Иоу Лэн, тус группын бүрэлдэхүүнд багтах Сингапурын Үндэсний Зүрхний Төвийн захирал хатагтай Алис Пан, тус төвийн Зүрхний мэс заслын зөвлөх эмч Др. Со Хуат Сион нарыг хүлээн авч уулзлаа. Уулзалтын эхэнд Др. Со Хуат Сион Эрүүл мэндийн сайд А.Цогцэцэг цаг гарган хүлээн авч уулзаж байгаад талархал илэрхийлээд, Сингапурын Үндэсний Зүрхний Төв нь зүрхний эмгэг судлал, зүрхний мэс заслын чиглэлээр Монгол Улсын Гуравдугаар Төв эмнэлэг болон бусад эмнэлгийн эмч, мэргэжилтнүүдтэй 2014 оноос хойш хамтран ажиллаж, харилцан туршлага солилцож, эмч, мэргэжилтнүүдийн чадавх бэхжүүлэх сургалт, эрдэм шинжилгээний хурлуудыг хамтран зохион байгуулж, амжилттай ажиллаж байгаа талаараа танилцуулав. Тэрбээр цааш нь, 2 жил тутам зохион байгуулдаг Азийн бүсийн Зүрх судасны эмч нарын бага хурлын ээлжит IX хурлыг ирэх жил Монгол Улсад зохион байгуулахаар төлөвлөж, УГТЭ-тэй хамтран бэлтгэл ажлыг хангаж эхэлсэн талаар товч танилцууллаа. Уулзалтын үеэр “SingHealth” группын Гадаад харилцааны газрын захирал Чуа Иоу Лэн группынхээ талаар, мөн Азийн улс орнуудад хэрэгжүүлж байгаа төслүүдийнхээ талаар товч танилцуулаад, Монгол Улсын эрүүл мэндийн салбарт тулгамдаж байгаа тодорхой асуудлыг шийдвэрлэхэд дэмжлэг үзүүлэх чиглэлээр хамтран төсөл хөтөлбөр хэрэгжүүлэх боломжтой тухай Эрүүл мэндийн сайдад танилцуулав. Сайд А.Цогцэцэг төлөөлөгчдөд хүрэлцэн ирж уулзаж, санал солилцож байгаад болон Монгол Улсын эрүүл мэндийн салбарт хамтран төсөл хөтөлбөр хэрэгжүүлэх боломжийн талаар танилцуулсанд талархал илэрхийлээд, эрүүл мэндийн салбарт Засгийн газраас баримталж байгаа бодлого чиглэл, эрх зүйн орчин, тулгамдаж байгаа асуудлуудын талаар товч мэдээлэл өгөв. Мөн тэрбээр, Сингапурын Үндэсний Зүрхний Төв манай УГТЭ-тэй зүрх судасны чиглэлээр хамтран ажиллаж байгаад талархалтай байгаагаа тэмдэглээд, уг хамтын ажиллагааг эрчимжүүлэх, өргөжүүлэх чиглэлээр Эрүүл мэндийн яамны зүгээс бүх талаар дэмжиж ажиллахаа илэрхийллээ. Мөн, Монгол Улсын хүн амын дундах зүрх судасны эмгэг, тэр дундаа Монголд эмчлэгдэх боломжгүй байгаа хүүхдийн болон насанд хүрэгчдийн зарим төрлийн зүрхний гажигийн оношлогоо, эмчилгээний арга технологид эмч, мэргэжилтнүүдээ багаар нь сургаж бэлтгэхийн чухлыг онцлоод, энэ чиглэлээр “SingHealth” групп, Сингапурын Үндэсний Зүрхний Төвтэй хамтын ажиллагаагаа улам нягтруулах хүсэлтэй байгаагаа илэрхийлэв. Төгсгөлд нь, ирэх жил Азийн Зүрх судасны эмч нарын IX бага хурлыг Монгол Улсад зохион байгуулахаар болсонд талархалтай байгаагаа хэлээд, уг хурлын бэлтгэл ажлыг хангах, хурлыг өндөр үр дүнтэй зохион байгуулах тал дээр Эрүүл мэндийн яамны зүгээс бүх талаар дэмжиж, хамтран ажиллахаа илэрхийлэв.

Ази, Номхон далайн бүсийн 31 дүгээр Жемборид оролцогчдод  үзүүлэх эмнэлгийн яаралтай тусламжийн бэлэн байдлыг  хангах

Ази, Номхон далайн бүсийн 31 дүгээр Жемборид оролцогчдод үзүүлэх эмнэлгийн яаралтай тусламжийн бэлэн байдлыг хангах

Ази, Номхон далайн бүсийн 31 дүгээр Жемборийг 2017 оны 07 дугаар сарын 27-ноос 08 дугаар сарын 02-ны өдрүүдэд Улаанбаатар хотод зохион байгуулагдах бөгөөд уг арга хэмжээнд 400 гаруй орны 6000 орчим хүүхдүүд майханд байрлан уг арга хэмжээнд оролцоно. Жемборид оролцогчдод эмнэлгийн яаралтай тусламжийн бэлэн байдлыг хангах ажлын хэсэг хуралдаж, дараах асуудлуудыг шийдвэрлэв. Үүнд: • Эмнэлгийн яаралтай тусламжийн бэлэн байдлыг хангах ажлын төлөвлөгөө боловсруулах; • Жемборийн арга хэмжээнд оролцогчдод эмнэлгийн яаралтай тусламж үзүүлэх мэргэшсэн баг ажиллуулах; • Эмнэлгийн яаралтай болон түргэн тусламжийн үйлчилгээнд шаардлагатай багаж, тоног төхөөрөмж, эм, эмнэлгийн хэрэгслийн бэлэн байдлыг хангах, нөөцийг бүрдүүлэх, Жемборийн оролцогч хүүхэд, багш нар хэвтэж эмчлүүлэх шаардлага гарсан тохиолдолд бэлэн байх 3-5 орны нөөцтэй байх, үйлчлэх эмчийг томилох • “Найрамдал” цогцолборт байрлан ажиллах эмч нарын хуваарь гаргаж, батлуулах; • Хачигт халдвар, хоолны хордлого, гэмтэл бэртэл, могойд хатгуулах, наршилтаас сэргийлэх талаар гарын авлага, мэдээлэл боловсруулж оролцогчдод мэдээлэл, сурталчилгаа зохион байгуулах чиглэлээр Эх, хүүхдийн эрүүл мэндийн үндэсний төв, Гэмтэл согог судлалын үндэсний төв, Улсын нэгдүгээр төв эмнэлэг, Халдварт өвчин судлалын үндэсний төв болон бусад эмнэлгийн байгууллагуудад үүрэг өгөв.

Энэ жил Дэлхийн хүн амын өдрийг “Иргэдээ чадавхижуулж, улс үндэстнээ хөгжүүлцгээе” уриан дор тэмдэглэж байна

Энэ жил Дэлхийн хүн амын өдрийг “Иргэдээ чадавхижуулж, улс үндэстнээ хөгжүүлцгээе” уриан дор тэмдэглэж байна

1990 оны 12-р сард НҮБ-ын Ерөнхий ассамблей 7-р сарын 11-ныг Дэлхийн хүн амын өдөр болгон тунхагласнаас хойш хүн амын асуудалыг нийгэм, улс төрийн үр дагаварыг олон нийтэд таниулан сурталчилах замаар гишүүн орнууд уг өдрийг тэмдэглэж ирлээ. Энэ жил НҮБ-ын Хүн амын сан, УИХ, Эрүүл мэндийн яам, Үндэсний статистикийн хороо хамтран 2017 оны Дэлхийн хүн амны өдрийг тохиолдуулан хэвлэлийн хурал зохион байгуулж, дэлхийн болон Монголын хүн амын асуудал, гэр бүл төлөвлөлтөөр дамжуулан Монголчуудын эрх, үндэсний хөгжлийг хангахын төлөө хэрхэн хамтран ажиллахаа танилцууллаа. Уг арга хэмжээг нээж Эрүүл мэндийн сайд А.Цогцэцэг хэлэхдээ Монгол Улсын Засгийн газраас 2016 оны 5 сард шинэчилэн баталсан “Хүн амын хөгжлийн талаар төрөөс баримтлах бодлого”, 2017 оны 1 сард баталсан “Төрөөс эрүүл мэндийн талаар баримтлах бодлого”-д Нөхөн үржихүйн эрүүл мэндийн гол асуудлууд, нэн ялангуяа гэр бүр төлөвлөлтийн асуудлаар баримтлах бодлогын чиглэлийг цаг үеийн нөхцөл байдалтай уялдуулан шинэчлэн тодорхойлсон. Гэр бүл, эмэгтэйчүүдийг хүүхдийн тоо, төрөлт хоорондын зайг өөрсдөө зохицуулах, “хэт эрт биш, хэт ойрхон биш, хэт орой биш” төрөх, нөхөн үржихүйн эрхийг хангасан гэр бүл төлөвлөлтийн чанартай, хүртээмжтэй, цогц үйлчилгээгээр хангах нь нөхөн үржихүйн эрүүл мэндийн чухал хэсэг бөгөөд эх, хүүхдийн эрүүл мэнд, амьдралын чанарыг дээшлүүлэх хамгийн үр дүнтэй арга хэмжээ болно. Эрүүл мэндийн салбар сүүлийн 20 жилийн хугацаанд нөхөн үржихүйн эрүүл мэндийн үндэсний дөрвөн удаагийн хөтөлбөр (1997-2016), “Эхийн эндэгдлийг бууруулах стратеги” (2001-2004, 2005-2010), “Нөхөн үржихүйн эрүүл мэндийн эм, хэрэгслийн аюулгүй байдал, тогтвортой хангамж стратеги” зэрэг 10 гаруй бодлогын баримт бичгийг хэрэгжүүлж эх, хүүхдийн эндэгдлийг бууруулан тодорхой үр дүнд хүрсэн. Гэсэн хэдий ч гэр бүл төлөвлөлтийн тусламж, үйлчилгээ тулгамдсан асуудал хэвээр байна. Тухайлбал: жирэмслэхээс сэргийлэх эм хэрэгслийн хэрэглээ, үр хөндөлт, бэлгийн замаар дамжих халдварын тохиолдол зэрэг гэр бүл төлөвлөлтийн тусламж, үйлчилгээний чанар, хүртээмжийг илэрхийлэх үзүүлэлтүүд хангалтгүй байна. Нийгмийн үзүүлэлтийн түүвэр болон бусад судалгаагаар гэр бүл төлөвлөлтийн хангагдаагүй хэрэгцээ 2003-2013 оны хугацаанд 4.6-аас 16.0 хувь болтлоо нэмэгдсэн. Энэ үзүүлэлт 15-19 насны охид, эмэгтэйчүүдийн дунд 36.4 хувь байгаа нь улсын дунджаас даруй 2 дахин өндөр байна. Нөхөн үржихүйн насны эмэгтэйчүүдийн дунд жирэмслэхээс сэргийлэх эм, хэрэгслийн хэрэглээ буурч байна. 2003 онд нөхөн үржихүйн насны эмэгтэйчүүдийн 69.0 хувь, 2008 онд 55.2 хувь нь жирэмслэхээс сэргийлэх ямар нэгэн эм, хэрэгсэл хэрэглэдэг байсан бол 2013 онд 54.6 хувь болж буурсан. Эрүүл мэндийн статистикийн 2016 оны үзүүлэлтээр нөхөн үржихүйн насны эмэгтэйчүүдийн 54 хувь нь жирэмслэхээс сэргийлэх эм, хэрэгсэл хэрэглэж байна. Үр хөндөлт, түүний дотор давтан үр хөндөлт ялангуяа өсвөр үеийнхэн, залуучуудын дунд нэмэгдсээр байна. 2008 онд үр хөндөлт 1000 амьд төрөлтөд 169.0, нөхөн үржихүйн насны 1000 эмэгтэйд 13.4 ногдож байсан бол 2016 онд үр хөндөлтийн 18316 тохиолдол бүртгэгдэж, 1000 амьд төрөлтөд 234.2, нөхөн үржихүйн насны 1000 эмэгтэйд 21.5 үр хөндөлт ногдож байна. Үр хөндөлт өмнөх оноос 148 тохиолдлоор буюу 0.8 хувиар өссөн ба 1000 амьд төрөлт тутамд 9.6 тохиолдлоор өссөн байна. Гэр бүл төлөвлөлтийн тусламж, үйлчилгээ дутмаг, жирэмслэхээс сэргийлэх эм, хэрэгслийн хангамж, хүртээмж, хэрэглээ хангалтгүйгээс хүсээгүй жирэмслэлт, хүсээгүй жирэмслэлтээс үр хөндөлт, үр хөндөлтөөс аюултай үр хөндөлт, аюултай үр хөндөлтөөс эхийн эрүүл мэнд амь нас хохирох ноцтой үр дагавар үүсэх тул гэр бүл төлөвлөлтийн тусламж үйлчилгээг хүртээмжтэй, чанартай үзүүлэх нь туйлаас чухал гэдгийг онцоллоо.

Түймрийн голомтонд ажиллаж буй 150 гаруй хүнд эмнэлгийн тусламж үйлчилгээг үзүүллээ

Түймрийн голомтонд ажиллаж буй 150 гаруй хүнд эмнэлгийн тусламж үйлчилгээг үзүүллээ

Улсын онцгой комиссоос энэ сарын 16-ны өдөр өгсөн үүрэг даалгаврын дагуу Төв аймгийн Батсүмбэр сумын 3 багийн нутаг дэвсгэрт гарч буй гал түймрийг унтраах ажлын хүрээнд Эрүүл мэндийн сайдын “Эмнэлгийн анхан шатны тусламжийн бэлэн байдлыг хангах ажлын хэсгийг байгуулан ажиллаж эхэлсэн. Энэ хүрээнд Төв аймгийн Батсүмбэр нутгийн 3 дугаар багийн нутагт байрлах “Цагаан нуга” зусланд Эмнэлгийн анхан шатны тусламж үзүүлэх цэг байгуулан 3 дахь өдрөө ажиллаж, 150 гаруй иргэнд үзлэг хийн 83 хүнд эмнэлгийн тусламж үйлчилгээг газар дээр нь үзүүллээ. Тус цэгт ажиллаж буй эмнэлгийн мэргэжилтнүүд түймэр унтраах багт ажиллаж буй хүмүүст болзошгүй эрсдлээс үүсэх түлэгдэлт, усгүйжилт, хэт халалт, хоолны хордлогын үеийн анхан шатны тусламж үйлчилгээг үзүүлж байгаа юм. Улсын онцгой комиссосс өгсөн үүрэг даалгаврын дагуу Төрийн тусгай албан хаагчдын нэгдсэн эмнэлгээс мэргэшсэн баг “Цагаан нуга” зуслан, Сэлэнгэ аймгийн “Мандал” суманд тус тус ажиллаж байна. 07 дугаар сарын 17-ны өдрийн 18 цагийн мэдээ Төв аймгийн нэгдсэн эмнэлгийн 2 эмч, 2 сувилагч, Батсүмбэр сумын 1 эмч, 1 сувилагч нийт 6 хүний бүрэлдэхүүнтэйгээр “Цагаан нуга” зусланд байрлаж буй эмнэлгийн цэгт ажиллаж байна. Түймэр гарч буй 3 отог байна. Нэгдүгээр отогт 100 гаруй хүн ажиллаж байгаа. Түймэрт яваагүй үлдсэн 8 хүнд үзлэг хийсэн. Тус отогт нийт 20 гаруй хоног ажиллаж байгаа ойн байцаагч ажиллаж байгаа бөгөөд даралт ихэссэн зовиуртай. Хоёрдугаар отогт 600 гаруй хүн ажиллаж байна. Түймэрт явалгүй үлдсэн байсан 37 хүнд үзлэг хийсэн. Тус отогт сайн дураар ажиллаж буй иргэд, онцгой байдлын штаб ажиллаж байна. Үзлэг хийсэн 37 хүнд толгой өвдөх, гүйлгэх зовиуртай. Тогооч өөрийн болгоомжгүйгээс хоол асгаж, хөлөө түлсэн бөгөөд шархыг цэвэрлэж, тусламж үзүүлсэн. Сайн дурын иргэп дунд хөгжлийн бэрхшээлтэй 1 иргэн байсныг үзлэгт хамруулж, гэрт нь буцаасан байна. Гуравдугаар отогт 50 гаруй хүн ажиллаж байна. Түймрийн байдал цурамд орсон, цурмыг манаж ажиллаж байна. Түймрийн голомт руу яваагүй 5 хүнд үзлэг хийсэн. Үзлэг хийсэн нийт хүний дийлэнхэд тойлгой өвдөх шинж тэмлэг илэрч байна. 2017 оны 07 дугаар сарын 17-ны өдрийн 23 цагийн мэдээ Төв аймгийн ЭМГ-аас “Цагаан нуга” зусланд ажиллаж байгаад 18-ны 03 цагт буцаж ирсэн. 18-ны өдрийн шөнийн 02 цагийн байдлаар Онцгой байдлын штаб байрлаж байгаа цэгт очиж 120 хүнийг үзлэгт хамруулсан. Үзлэг хийхэд дйилэнх нь хөл холгож, цэврүүтсэн, толгой өвдөх, даралт ихсэх зовиуртай. Хөл холгож, цэврүүтсэн хүмүүсийн шархыг цэвэрлэж, хоёр хүнд эмнэлгийн тусламж үзүүлж онцгой анхаарал хандуулж ажилласан. Төв аймгийн онцгой байдлын газраас эмч, мэргэжилтнүүдийг “Цагаан нуга” зусланд байрлаж байх, шаардлагатай тохиолдолд дуудаж, тусламж авах команд өгсөн. Сайн дураар очсон иргэд гал тогооны ажилд туслах ажлыг хийж гүйцэтгэж байгаа бөгөөд түймрийн голомт хэсэг рүү явуулахгүй байгаа. Сумын засаг даргын тамгын газарт сайн дурын үндсэн дээр цуглаж буй тусламж, хандив дэмжлэгийг бүртгэж авч, галын нөхцөл байдалтай танилцуулж, иргэдийг буцааж байна. Төрийн тусгай албан хаагчдын нэгдсэн эмнэлгийн 7 хүний бүрэлдэхүүнтэй баг “Хөх чулуут” газарт томилогдож явсан. 2017 оны 07 дугаар сарын 18-ны өдрийн 02 цагийн мэдээ Төв аймгийн нэгдсэн эмнэлгийн 2 эмч, 2 сувилагч, Батсүмбэр сумын 1 эмч, 1 сувилагч нийт 6 хүний бүрэлдэхүүнтэйгээр “Цагаан нуга” зусланд байрлаж буй эмнэлгийн цэгт ажиллаж байна. Нийт 150 хүнд үзлэг хийснээс 83 хүнд эмнэлгийн анхан шатны тусламж /хөлийн холгосон шархыг цэвэрлэх, хорлогын тусламж/ үзүүлсэн. Тусламж үзүүлсэн дийлэнх хүний нүд аргасан зовиуртай. Хиймэл нулимс хэрэглэж байгаа бөгөөд нөөц дууссан тул аймгийн ЭМГ-аас нэмэлтээр татаж авч байна. 2017 оны 07 дугаар сарын 18-ны өдрийн мэдээ /Төрийн тусгай албан хаагчдын нэгдсэн эмнэлэг/ Төрийн тусгай албан хаагчдын нэгдсэн эмнэлгээс 2 шуурхай бүлгийг 17-ны өдөр томилж, ажиллуулсан. “Цагаан нуга” чиглэлд явсан баг нийт 120 хүнд үзлэг хийсэн. Үзлэгээр угаарталд орсон, даралт ихэссэн зовиуртай, одоогоор гэмтэж, бэртсэн хүн байхгүй. Сайн дураар ажиллахаар ирсэн иргэдийг Улаанбаатар хот руу буцаасан. Онцгой байдлын газрын бие бүрэлдэхүүн ажиллаж үлдсэн. “Хөх чулуут” газарт томилогдож, 50 гаруй хүнд үзлэг хийхээр явж байна. “Мандал” сумын чиглэлд явсан шуурхай баг Цүнхэл тосгоны хүн эмнэлгийг түшиглэн тусламж үзүүлсэн. Одоогоор хүзүүндээ хатигтай, нурууны архаг өвдөлт мэдэрсэн онцгой байдлын албан хаагчийг эмнэлэгт хэвтүүлэн эмчлүүлж байна. Тус бүсэд 5 газар гал гарсан байна. Нар гарч халах тохиолдолд хуурайшилт нэмэгдэн, хяналтаас гарах магадлал өндөр. Онцгой байдлын 124 дүгээр зэвсэгт хүчин болон иргэд бүхий 80 гаруй хүн ажиллаж байна. Ууланд эмчилгээ хийлгэх шаардлагатай хэдэн албан хаагч байна. Олон хоног ажиллаж яварснаас хатиг гарах зовиур дийлэнх байна. Эмнэлгийн байрыг түшиглэг жижиг мэс ажилбар, эмчилгээ хийхээр төлөвлөж байна.

Гал түймрийг унтраах ажлын хүрээнд эмнэлгийн анхан шатны тусламж үзүүлэх цэгийг ажиллуулж эхэллээ

Гал түймрийг унтраах ажлын хүрээнд эмнэлгийн анхан шатны тусламж үзүүлэх цэгийг ажиллуулж эхэллээ

Улсын онцгой комиссоос 2017 оны 07 дугаар сарын 16-ны өдөр өгсөн үүрэг даалгаврын дагуу Төв аймгийн Батсүмбэр сумын 3 багийн нутаг дэвсгэрт гарч буй гал түймрийг унтраах ажлын хүрээнд Эрүүл мэндийн сайдын “Эмнэлгийн анхан шатны тусламжийн бэлэн байдлыг хангах ажлын хэсгийн бүрэлдэхүүн батлах тухай” тушаалаар ажлын хэсгийг байгуулан ажиллаж байна. Тус ажлын хэсгийн бүрэлдэхүүнд Эрүүл мэндийн дэд сайд Л.Бямбасүрэн, Эмнэлгийн тусламжийн газрын дарга Я.Буянжаргал, Халдварт өвчин судлалын үндэсний төвийн ерөнхий захирал Д.Нямхүү, Гэмтэл согог судлалын үндэсний төвийн Түлэнхийн тасгийн эрхлэгч Э.Галбадрах, Төв аймгийн Эрүүл мэндийн газрын дарга С.Мөнхтуяа, Эрүүл мэндийн яамны дэргэдэх Хор судлалын мэргэжлийн салбар зөвлөлийн дарга С.Юндэн, Төрийн тусгай албан хаагчдын нэгдсэн эмнэлгийн дарга Л.Баттөр, НЭМҮТ-ийн тандалт судалгаа, хордлого, цацрагийн шуурхай албаны дарга Р.Даваадорж, Цэргийн төв эмнэлгийн дарга Ч.Гүрбазар нар ажиллаж байна. Ажлын хэсгийн гишүүд Төв аймгийн Батсүмбэр нутгийн 3 дугаар багийн нутагт байрлах “Цагаан нуга” зусланд эмнэлгийн анхан шатны тусламж үзүүлэх цэг байгуулах, байдалтай газар дээр нь танилцахаар ажиллаж байгаа бөгөөд тус цэгт ашиглагдах 3 ширхэг өвчтөний хяналтын монитор, эмнэлгийн 2 ширхэг функциональ ор, хэт халалтаас үүсэх хорлого, тархины хавангийн үед ашиглах “мөсөн жин”-г бэлдэх 1 ширхэг ахуйн хэрэглээний хөлдөөгчийг хангахаар боллоо. “Цагаан нуга” дахь эмнэлгийн анхан шатны тусламж үзүүлэх цэг нь гал түймэр унтрааж буй багт болзошгүй эрсдлээс үүссэн түлэгдэлт, угаар, хэт халууны шалтгаант хордлогын үед анхан шатны тусламж, үйлчилгээ үзүүлэх бөгөөд Гэмтэл согог судлалын үндэсний төвийн Хорлогын төв, Цэргийн төв эмнэлэг, Төрийн тусгай албан хаагчдын нэгдсэн эмнэлэг чиг үүргийн дагуу мэргэжсэн тусламж үйлчилгээг үзүүлнэ.

Хөвсгөл аймаг Гемодиализын тасагтай болов

Хөвсгөл аймаг Гемодиализын тасагтай болов

Хөвсгөл аймгийн нэгдсэн эмнэлэгт бөөрний гемодиализын тасгийг энэ сарын 6-нд шинээр нээлээ. Нээлтийн үйл ажиллагаанд аймгийн Засаг дарга Л.Ганболд, Нийгмийн бодлогын хэлтсийн дарга Ж.Ганболд, Аймгийн Эрүүл мэндийн газрын дарга М.Үүрийнбаяр, Нэгдсэн эмнэлгийн дарга С.Чагнаадорж болон бусад албаны хүмүүс, үйлчлүүлэгчдийн төлөөлөл оролцлоо. Тус аймгаас 18 иргэн нийслэл хотын улсын болон хувийн эмнэлгүүдэд бөөр орлуулах аппаратад орж эмчилгээ хийлгэдэг байна. Тэдгээр иргэдийн ар гэрийн санаачлагаар аймгийн Засаг дарга, Айвико компани, Эрүүл мэндийн яамны дэмжлэгтэйгээр ийнхүү бөөрний гемодиализын тасгийг хамтарсан хөрөнгө оруулалттайгаар байгууллаа. Энэхүү тусламж үйлчилгээг бий болгосноор өвчтөн болон тэдний ар гэрийнхэн нийслэл хотыг зорьж, цаг хугацаа, санхүүгийн эрсдэлд оролгүйгээр өөрийн аймагтаа эмчилгээ, үйлчилгээнд хамрагдах бүрэн боломжтой боллоо. “Айвико” ХХК-аас Японы Nipro, NCU-18 маркийн 80 сая төгрөгийн өртөгтэй гемодиализын хоёр аппаратыг хандивласан бол 33.0 сая төгрөгний өртөгтэй ус цэвэршүүлэх төхөөрөмж болон барилгын засвар, тохижилтын зардлыг Аймгийн Засаг дарга, ИТХ-аас шийдвэрлэсэн. Мөн ЭМЯ-наас гемодиализын 4 ширхэг ор болон дагалдах эмнэлгийн тоног төхөөрөмжөөр хангаж хамтарч ажилласан. Тус тасаг одоогоор диализын эмч, сувилагч, техникч гэсэн 3 хүний бүрэлдэхүүнтэйгээр ажиллаж байна. Цаашид илүү олон өвчтөнд үйлчилгээ үзүүлэхээр хүний нөөц болон 2 аппарат, бусад дагалдах тоног төхөөрөмжөөр хангах ажлыг төлөвлөн хөрөнгө оруулалтын эх үүсвэрийг хайн ажиллаж байна.

Сайд А.Цогцэцэг эх барих, эмэгтэйчүүдийн эмч нартай уулзав

Сайд А.Цогцэцэг эх барих, эмэгтэйчүүдийн эмч нартай уулзав

Эрүүл мэндийн сайд А.Цогцэцэг ЭХЭМҮТ, нийслэлийн амаржих газрууд, 9 дүүргийн нийт 130 гаруй эх барих, эмэгтэйчүүдийн эмч нартай уулзаж цаг үеийн асуудлаар ярилцаж, санал солилцлоо. Уулзалтаар Монгол улсын Засгийн газар, Эрүүл мэндийн яамнаас эх, нярайн эрүүл мэндийн тусламж, үйлчилгээг сайжруулах чиглэлээр тодорхой үйл ажиллагааг шуурхай авч хэрэгжүүлсний үр дүнд 2017 оны эхний 6 дугаар сарын байдлаар эхийн эндэгдэл 100,000 амьд төрөлтөд 25 болж, өнгөрсөн оны мөн үетэй харьцуулахад 36.7-оор буурсныг Эрүүл мэндийн сайд А.Цогцэцэг онцлоод энэ амжилтад хүрэхэд эх барих, эмэгтэйчүүд, нярай, мэдээгүйжүүлэг-эрчимт эмчилгээний эмч нарын хүчин зүтгэл их байсан гэдгийг дурьдлаа. Мөн цааш нь хэдий ачаалал ихтэй, нойргүй ажилладаг ч эзэмшсэн мэргэжилдээ эзэн болж, өргөсөн тангарагтаа үнэнч байж, жирэмсэн эмэгтэйд эмнэлгийн тусламж, үйлчилгээг чирэгдэлгүй, чанартай, шуурхай үзүүлэхийг анхааруулаад ихэнх алдаа, дутагдал харьцаа хандлага, ёс зүйтэй холбоотой үүсч байгааг сануулаад ажил хөдөлмөрөрөө шалгарсан 10 эмчийг Эрүүл мэндийн тэргүүний ажилтан цол тэмдэг, жуух бичгээр шагналаа. Эрүүл мэндийн яамны Эх барих, эмэгтэйчүүдийн мэргэжлийн салбар зөвлөлийн дарга Д.Мөнхцэцэг эхийн эндэгдлийн өнөөгийн байдалд хийсэн дүн шинжилгээ, цаашид авч хэрэгжүүлэх үйл ажиллагааны төлөвлөгөөг, Эрүүл мэндийн яамны Эмнэлгийн тусламжийн газрын дарга Я.Буянжаргал Үндэсний их баяр наадмын үеэр эмнэлгийн тусламж, үйлчилгээний бэлэн байдал, чанарыг хангаж ажиллах тухай Эрүүл мэндийн сайдын албан даалгаврыг тус тус танилцууллаа. Уг уулзалтын төгсгөлд энэ жил Эрүүл мэндийн яамнаас эх барих, эмэгтэйчүүдийн эмч нарын мэдлэг, ур чадварт ихээхэн анхаарч нийт 20 эмчийг БНХАУ, Тайландын Вант улсад мэргэжил дээшлүүлэх сургалтад хамруулсан бөгөөд Тайландын Вант улсын Эсэн мэнд амаржихуй ба нярайн асаргаа сэдэвт сургалтад оролцсон эх барих, эмэгтэйчүүдийн эмч Ж.Оюунцэцэг явсан туршлагаасаа мэргэжил нэгт нөхөдтэйгээ хуваалцлаа. Эрүүл мэндийн сайд эх барих, эмэгтэйчүүдийн эмч нарыг хүлээн авч уулзан, тулгамдаж буй асуудлыг ярилцан санал солилцсонд эмч, мэргэжилтнүүд талархалтай байгаагаа илэрхийллээ.

"Наршилтын эсрэг - Бүрх малгайтай - Өвөрхангайчууд"

Өвөрхангай аймгийн Эрүүл мэндийн газраас "Наршилтын эсрэг - Бүрх малгайтай - Өвөрхангайчууд" 2 сарын аянг аймгийн хэмжээнд 2017 оны 07-р сарын 03-ны өдрөөс эхлэн зохион байгуулж төрийн болон төрийн бус байгууллага, иргэд олон нийтийг уг аянд нэгдэхийг уриалан ажиллаж байна. Энэхүү аянд нэгдэж буй хүн бүр: - Хэт халалттай, нартай өдрүүдэд наршилт, харшил, даралт ихсэлт, цус харвалт, зүрх судасны бусад хүндрэл үүсэх эрсдэлүүд ихэсдэг учраас өөрөө болон гэр бүл, найз нөхөд, хамт олноо нарны малгай өмсөхийг уриалж, эрүүл зан үйл, дадлыг дэлгэрүүлэх юм.

Эх, нярайд үзүүлэх тусламж, үйлчилгээний чанарт анхаарч ажиллахыг үүрэг болгов

Эх, нярайд үзүүлэх тусламж, үйлчилгээний чанарт анхаарч ажиллахыг үүрэг болгов

Эрүүл мэндийн дэд сайд Л.Бямбасүрэн, Эрүүл мэндийн яамны Эмнэлгийн тусламжийн газрын дарга Я.Буянжаргал нар нийслэлийн Хүрээ амаржих газарт урсгал засвар орсонтой холбоотой нийслэлийн Өргөө, Амгалан амаржих газруудад эх барихын тусламж, үйлчилгээг түр зохицуулах болсонтой холбоотой тушаалын хэрэгжилт, хүний нөөц, тусламж, үйлчилгээ, эм, эмнэлгийн хэрэгслийн бэлэн байдлын талаар ярилцлаа. Дэд сайд Л.Бямбасүрэн амаржих газруудын дарга нарт иргэдэд чирэгдэлгүй үйлчилж, эх, нярайд үзүүлэх тусламж, үйлчилгээний чанарт анхаарч ажиллахыг анхааруулаад Өргөө, Амгалан амаржих газарт жижүүрлэж буй эмч, эх баригч, сувилагч нарын тоог нэмэгдүүлэх, хүлээн авах, яаралтай тусламжийн тасгийн эмчийн тоог нэмж, туршлагатай эмч ажиллуулах, эрэмбэлэн ангилалтын чанарт анхаарах, халдвар хамгааллын дэглэмийг чанд мөрдүүлж, тусламж, үйлчилгээний бэлэн байдлыг хангаж эм, эмнэлгийн хэрэгсэл, цус цусан бүтээгдэхүүний хангалтыг нэмэгдүүлэхийг үүрэг болголоо. Мөн баярын амралт олон өдөр тохиож байгаа тул эх, нярайн эндэгдэл, аливаа эрсдэл үүсэхээс сэргийлж нийслэлийн Эрүүл мэндийн газрын дарга, удирдлагууд, амаржих газруудын дарга нар, эмчилгээ эрхэлсэн орлогч, чанарын менежерүүдийг хариуцлагатай жижүүрийн хуваарь гарган, амаржих газруудын үйл ажиллагаа, тусламж, үйлчилгээний чанарт хяналт тавьж ажиллахыг анхаарууллаа.

Вакцин, биобэлдмэлийн төлөвлөлт, зохицуулалтын хороо хуралдлаа

Вакцин, биобэлдмэлийн төлөвлөлт, зохицуулалтын хороо хуралдлаа

Дэд сайд Л.Бямбасүрэнгээр ахлуулсан Вакцин биобэлдмэлийн төлөвлөлт, зохицуулалтын хорооны ээлжит хурал өнөөдөр хуралдлаа. Хурлаар товлолын болон тархвар судлал, сайн дурын дархлаажуулалтад шаардагдах вакцин, биобэлдмэл, зүү тариур, аюулгүй хайрцаг болон хүйтэн хэлхээний тоног төхөөрөмжийн 2018 онд шаардагдах хэрэгцээний төслийг хэлэлцэв. Мөн дархлаажуулалтын төсвийн 2017 оны эхний хагас жилийн гүйцэтгэлтэй танилцаж, цаашид авах арга хэмжээний талаар санал солилцлоо. Энэ үеэр Дэд сайд бөгөөд хурлын дарга Л.Бямбасүрэн хэлэхдээ Монгол улсын Засгийн газар нь товлолын болон бусад дархлаажуулалтад шаардлагатай бүх вакцин, биобэлдмэл, зүү тариур бусад дагалдах хэрэгслийн бүрэн хариуцдаг нь сайн боловч санхүүжилтийг нэмэгдүүлэх, тогтвортой байдлыг хангахад онцгой анхаарал хандуулж ажиллах нь чухал. Мөн дархлаажуулалтын хөтөлбөр болон санхүүгийн тогтвортой байдлын олон улсын үнэлгээний дүн гарсныг онцлоод, улс орны эдийн засгийн байдал, болон бусад бодлогуудтай уялдуулан, дархлаажуулалтад шаардлагатай төсвийг оновчтой төлөвлөж, зарцуулалтад нь хяналт тавьж, улмаар төсвийг аажим нэмэгдүүлэх боломжийг судлан шийдвэрлэхэд санаачилгатай ажиллах талаар холбогдох хүмүүст үүрэг даалгавар өглөө.

Баярын үеэр бэлэн байдлыг хангаж ажиллахыг үүрэг болголоо

Баярын үеэр бэлэн байдлыг хангаж ажиллахыг үүрэг болголоо

Улсын баяр наадмын үеэр эмнэлгийн тусламж, үйлчилгээний чанар, аюулгүй болон бэлэн байдлыг хангаж ажиллахыг Эрүүл мэндийн сайд А.Цогцэцэг бүх аймаг, нийслэлийн Эрүүл мэндийн газар, БОЭТ, Төв эмнэлгүүд, тусгай мэргэжлийн төвийн дарга, захирал нарт үүрэг болгож, дараах зөвлөмжийг хүргүүллээ. Үүнд:

ЭМЯ: НААДМААР НАРШИХ, ХООЛНЫ ХОРДЛОГОД ОРОХООС СЭРЭМЖЛҮҮЛЖ БАЙНА

ЭМЯ: НААДМААР НАРШИХ, ХООЛНЫ ХОРДЛОГОД ОРОХООС СЭРЭМЖЛҮҮЛЖ БАЙНА

Жил бүрийн баяр наадмын өдрүүдэд нийгмийн эрүүл мэндийн асуудлууд болох хүн амын дундах хоолны хордлого, архины хордлого, усанд живэлт,осол гэмтэл, тэр дундаазам тээврийн осол, наршилт, артерийн даралт ихсэлтийн тохиолдлууд нэмэгддэг. Тиймээс ард иргэдэд сэрэмжлүүлэх үүднээс өнөөдөр ЭМЯ, Нийгмийн эрүүл мэндийн үндэсний төв, Нийслэлийн эрүүл мэндийн газар, Замын цагдаагийн албанаас хамтран олон нийтэд хандан мэдээлэл хийж байна. Монгол улсын хэмжээнд 2016 оны байдлаар 107559 хүн гэмтэж, зам тээврийн ослоор 17197 хүн гэмтэж, 484 хүн нас барсан нь нийт осол гэмтлийн шалтгаант өвчлөл, нас баралтын 2-р шалтгаан болж байна. Зам тээврийн ослын улмаас гэмтэгсэд нийслэлд их байгаа боловч нас баралтын түвшин орон нутагт өндөр байна. Харин хоол хүнсээр дамжих өвчин, гэдэсний халдвар 2016 оны байдлаар улсын хэмжээнд бактерийн гаралтай хоолны хордлогот халдварын 430, сальмонеллёзын 181, цусан суулгын 2848 тохиолдол тус тус бүртгэгдсэн бөгөөд өвчлөлийг сараар үзвэл 4-р сараас ихсэж, 5-7 сард дээд цэгтээ хүрч, 9-р сараас буурч эхэлдэг. /ЭМХТ–ийн 2016 оны үзүүлэлт/ Усанд живэлт 2017оны07 дугаар сарын 03-ны өдрийн байдлаар 12 аймгийн 29 сум, нийслэлийн 4 дүүрэгт нийт 42 удаагийн усны осол гарч, 53 хүн амь насаа алдсан байна. Үүнээс 10 хүүхэд, 43 нь насанд хүрэгсэд байгаа юм./ОБЕГ/ Тиймээс иргэд та бүхнийг баяр наадмын өдрүүдэд анхаарал болгоомжтой амарч, зугаалж, наршилт, даралт ихсэх, усанд живэх, хоолны хордлого, архины хордлого, зам тээврийн осол гэмтлээс сэргийлж, 8-аас дээш сартай жирэмсэн эхчүүд хол замд зорчихгүй байхыг анхааруулж байна. Иргэд та бүхэн дараах зөвлөмжийг олон нийтэд түгээнэ үү. Үүнд: 1. Архи дарс хэтрүүлэн хэрэглэхгүй байх 2. Голын ойр орчим бага насны хүүхдийг явуулахгүй байх 3. Согтууруулах ундаа хэрэглэсэн үед гол усанд орохгүй байх 4. Хоол хүнсээ зөв хадгалан, гарын ариун цэврийг сайтар сахих 5. Ил задгай газраас хоол хүнс худалдан авахгүй байх 6. Даралтны эмээ тогтмол ууж, хэт халалтын үед гадуур явахгүй байх 7. Үер усны аюулаас болгоомжилж, гол усны түвшин нэмэгдэж байгаатай холбогдуулан голд сэлэхгүй байхыг анхааруулж байна.

ЕРӨНХИЙ САЙДЫН ИВЭЭЛ ДОР ОЛОН УЛСЫН ЭРХТЭН ШИЛЖҮҮЛЭН СУУЛГАЛТЫН ХУРАЛ БОЛНО

ЕРӨНХИЙ САЙДЫН ИВЭЭЛ ДОР ОЛОН УЛСЫН ЭРХТЭН ШИЛЖҮҮЛЭН СУУЛГАЛТЫН ХУРАЛ БОЛНО

Монгол улсын Ерөнхий сайдын ивээл дор зохион байгуулагдах “Эрхтэн шилжүүлэн суулгалтын хүний нөөцийг чадавхижуулах нь” Олон улсын хоёрдугаар хурал энэ сарын 9,10-ны өдрүүдэд Blue Sky цамхагт болох гэж байна. Энэхүү хурлыг Эрхтэн шилжүүлэн суулгалтын Монголын холбоо, ЭМЯ, УНТЭ, Дэлхийн эрхтэн шилжүүлэн суулгалтын нийгэмлэг (TTS), Солонгос улсын эрхтэн шилжүүлэн суулгалтын нийгэмлэг (KST), Япон улсын эрхтэн шилжүүлэн суулгалтын нийгэмлэг (JST), Vitallink, Raphael International байгууллагууд хамтран зохион байгуулж байгаагаар илүү онцлогтой. Хуралд Ерөнхий сайд Ж.Эрдэнэбат, УИХ, Засгийн газрын гишүүд, ЭМЯ-ны удирдлагууд, ДЭМБ-ын суурин төлөөлөгч, эрдэмтэн, эмч мэргэжилтэнүүд оролцохоос гадна БНСУ, АНУ, Их Британи, ОХУ, БНХАУ, Энэтхэг зэрэг нийт 25 орны эрдэмтэн, судлачид оролцож, эрхтэний донор болон эрхтэн шилжүүлэн суулгалттай холбоотой эрхзүйн зохицуулалт, бүтэц, олон улсын байгууллагын бодлого, удирдамжуудыг хэлэлцэх аж. Манай улс 1996 онд хамгийн анх бөөр шилжүүлэн суулгах мэс заслыг хийж байсан. Түүнээс хойш 136 бөөр, 36 элэг, 4 үүдэл эс шилжүүлэн суулгах эмчилгээг хийгээд байна. Мөн зүрх шилжүүлэн суулгах мэс заслыг гахайн дээр амжилттай туршаад явж байна. Монголын эрхтэн шилжүүлэн суулгах мэс заслын багууд дэлхийд хүлээн зөвшөөрөгдсөн төдийгүй сүүлийн үеийн дэвшилтэт технологи, инновацийг эх орондоо нутагшуулахын төлөө зорьж байгаа юм байна. Хурал хоёр өдөр үргэлжилэх бөгөөд эхний өдөр буюу 7 дугаар сарын 9-ний өдөр нэгдсэн хуралдаан болох бөгөөд манай орны хувьд эрхтэн шилжүүлэн суулгахад үндсэн бүрэлдэхүүн, Засгийн газраас ямар зохицуулалт хийдэг, донорын үндсэн бүртгэл гэж юу болох, эрхтэнийг хэрхэн хуваарилах ёстой, Тархины үхэл гэж юу вэ, Азийн орнууд донорын бүртгэлийг хэрхэн хийдэг талаар нийтлэг сэдвүүдээр 15 лекц тавигдана. Харин хулын хоёр дах өдөр буюу 7 дугаар сарын 10-ны өдөр бөөр, элэг, цус төлжүүлэгч үүдлийн эс, зүрх шилжүүлэн суулгалттай холбоотой 4 салбар хуралдаан дөрвөн танхимд болно. Мөн эрхтэний донор сурталчилах үйл ажиллагаа тус тус зохион байгуулагдана. Энэ өдрийн онцлох гол арга хэмжээний нэг нь Олон улсын байгууллагуудтай хамтран 7 дугаар сарын 10-ны өдрийн 16 цагт хэвлэлийн бага хурлыг зохион байгуулах аж. Сонирхсон хэн бүхэн энэ хуралд хамрагдах боломжтой юм байна.

ДЭЛХИЙД ХҮЛЭЭН ЗӨВШӨӨРӨГДСӨН

ДЭЛХИЙД ХҮЛЭЭН ЗӨВШӨӨРӨГДСӨН "ЭРХТЭН ШИЛЖҮҮЛЭН СУУЛГАХ ҮНДЭСНИЙ БАГ"-ИЙГ ТАНИЛЦУУЛЖ БАЙНА

УНТЭ дээр Бөөр болон Элэг, Ясны чөмөг, үүдэл эс шилжүүлэн суулгах үндэсний багууд төвлөрөн ажиллаж буй бөгөөд эдгээр багуудын эмч мэргэжилтэн боловсон хүчинд тулгуурлан тоног төхөөрөмж, багаж хэрэглэлээр хангагдсан оношлогоо, эмчилгээ сувилгаа, хяналтын нэгдсэн үйл ажиллагааны суурь тавигдсан билээ. Эдгээр багуудын үйл ажиллагаа нь тогтмол, нийтэд хүрэлцээтэй, нэгдмэл зорилго удирдлагатай байж, гадаадын ижил төстэй үйл ажиллагаа явуулдаг эрхтэн шилжүүлэн суулгах төв, институттэй хамтран ажиллах, эрхтэн шилжүүлэн суулгах мэс заслын эмчилгээ хийх, эрдэм шинжилгээ, сургалт судалгаа, мэдээллийн нэгдсэн сан байгуулах зэрэг олон талт үйл ажиллагааг нэгтгэж байхын тулд тус эмнэлэг дээр 2012 онд Эрхтэн шилжүүлэн суулгах төвийг байгуулсан. Ингээд Эрхтэн шилжүүлэн суулгах үндэсний багуудыг танилцууж байна.

Сувилагч нарыг  Япон Улсад мэргэжил дээшлүүлэхэд дэмжин ажиллана

Сувилагч нарыг Япон Улсад мэргэжил дээшлүүлэхэд дэмжин ажиллана

Эрүүл мэндийн сайд А.Цогцэцэг Японы Эрүүл мэнд, нийгмийн халамжийн олон улсын их сургуулийн Ерөнхийлөгч Кунинори Такаги тэргүүтэй төлөөлөгчдийг хүсэлтийн дагуу ЭМЯ дээр хүлээн авч уулзав. Уулзалтын эхэнд ноён Кунинори Такаги сургуулийнхаа талаар танилцуулж, тус сургуульд одоогоор анагаахын чиглэлээр монгол улсаас хоёр оюутан тэтгэлэгтэй суралцаж байгааг дуулгахын зэрэгцээ цаашид сувилагч бэлтгэх сургууль байгуулах зэрэг хоёр улсын эрүүл мэндийн салбар дахь харилцаа хамтын ажиллагааг өргөжүүлэн ажиллах хүсэлтэй байгаагаа илэрхийлэв. Сайд А.Цогцэцэг хоёр улсын эрүүл мэндийн салбар дахь хамтын ажиллагаа өргөжин хөгжиж, олон төсөл хөтөлбөрүүдийг хамтран амжилттай хэрэгжүүлж байгааг онцлоод, цаашид анагаахын чиглэлээр суралцаж буй оюутнуудад олгодог Эрүүл мэндийн сайдын нэрэмжит тэтгэлэгт хөтөлбөрийг өргөжүүлэх, сувилагч нарыг Япон Улсад мэргэжил дээшлүүлэх сургалтад хамруулах, харилцан сувилагч солилцох, эмч мэргэжилтнүүдийг багаар нь сургах ажлыг хамтран зохион байгуулах боломжтойг онцоллоо. Уулзалтын үеэр талууд хэд хэдэн асуудлаар харилцан ярилцаж, Монгол Улсад сувилахуйн чиглэлээр сургууль байгуулах саналыг сайд А.Цогцэцэг энэ үеэр дэмжиж илэрхийлэн цаашид хамтын ажиллагааг өргөжүүлэхэд ЭМЯ-ны зүгээс дэмжлэг үзүүлэн ажиллахаа мэдэгдлээ.

 “Зоонозын өвчнүүдийн тулгамдсан асуудал” сэдэвт ОУ-ын хамтарсан эрдэм шинжилгээний хурал эхэллээ

“Зоонозын өвчнүүдийн тулгамдсан асуудал” сэдэвт ОУ-ын хамтарсан эрдэм шинжилгээний хурал эхэллээ

Сүүлийн жилүүдэд зоонозын гаралтай өвчлөлүүд, түүний дотор шинэ болон шинээр сэргэж буй халдварууд олон улсын түвшинд нийгмийн эрүүл мэндийн онцгой байдал үүсгэх хэмжээний томоохон асуудлууд болоод байгаа билээ. Иймээс шинэ болон сэргэн тархаж байгаа халдварт өвчнүүдийн үүсгэгчийг байгаль, мал, амьтан, дамжуулагчдын дунд болон хүнээс хүнд хэрхэн орчиж буйг байгаль, дэлхий, уур амьсгалын өөрчлөлт, шилжилт хөдөлгөөн, улс орны нийгэм эдийн засгийн байдал, хүн амын амьдралын нөхцөл, онцлог, хүнсний хэрэгцээ зэрэг олон үзүүлэлттэй харьцуулан биологийн болон анагаахын шинжлэх ухааны ололт, технологийн дэвшлийг ашиглан судалж, зүй тогтлыг илрүүлэх нь нэн чухал юм байна. Зоонозын өвчин судлалын үндэсний төвөөс 2 жил тутамд уламжлал болгон зохион байгуулдаг энэ удаагийн “Зоонозын өвчнүүдийн тулгамдсан асуудал” олон улсын эрдэм шинжилгээний 22 дугаар хуралд салбар хоорондын хамтын ажиллагааны байгууллагууд болон тус төвтэй хамтын ажиллагаа бүхий улс орнуудын төлөөлөл ОХУ, БНХАУ, Казахстан, ХБНГУ зэрэг улсын эрдэмтэн судлаачид оролцож байна. Энэхүү хурлын зорилго нь зоонозын халдварт өвчинтэй тэмцэх үйл ажиллагаанд үндэсний хэмжээнд төдийгүй олон улсын хэмжээнд ижил төстэй үйл ажиллагаа явуулдаг мэргэжлийн байгууллагуудтай харилцан мэдээ, мэдээлэл солилцох, туршлага хуваалцах, хамтын ажиллагааг хөгжүүлэхэд чиглэгдэж байна. Нээлтийн үеэр Эрүүл мэндийн сайд А.Цогцэцэг хэлсэн үгэндээ “Зоонозын халдвар нэг улсын төдийгүй бүс нутгийн, улмаар дэлхийн нийтийн асуудал болсон энэ үед зоонозын халдварын тулгамдсан асуудлаар олон орны эрдэмтэн судлаачид, түүний дотор манай мөнхийн хөрш ОХУ, БНХАУ-ын судлаачид оролцон мэдлэг туршлагаа хуваалцаж буйд ЭМС-ын хувьд туйлын талархалтай байна. Гадны 10 гаруй эрдэмтэн судлаачид оролцож байгаа нь энэ хурлын ач холбогдол улам өндөр болгож байна. Энэ хурлаас сайхан үр дүн хүлээж байгаа бөгөөд тулгамдаж буй асуудлаар та бүхний гаргасан шийдвэрийг сайд би биелүүлэх болно гэв. Нийт 100 гаруй эрдэмтэн, судлаач, эмч мэргэжилтнүүд оролцож буй энэхүү хурлаар “Баянзүрх дүүрэгт хийсэн эзэнтэй ба золбин нохойн тооллого, нохойгоор дамжих зоонозын өвчний тандалт судалгааны дүн”, “Орос, Монголын нутагт тархсан иксод хачгийн төрөл зүйлд үзүүлж буй уур амьсгалын өөрчлөлтийн нөлөөлөл”, “Казахстан улсын өмнөд хэсэгт бүртгэгдсэн хачигт энцефалитын хүний өвчлөл”, “Дундговь аймагт хийгдсэн хачгаар дамжих халдварын тандалт судалгааны дүн”, “Алмат орчим бүс нутаг нь хачигт риккетсиозын зүйлүүдийн Казахстан дахь хамгийн их холилдсон хэсэг болж байна”, “Говь-Алтай аймгийн Цогт сумын D.nuttali хачгинд зарим зооноз өвчний шинжилгээ хийсэн дүн”, “Монгол-Хятадын хил орчмын нутгийн хачиг ба мэрэгчийн дамжуулагчаар дамжих халдварт өвчний халдварлалт, Хятад-Монголын хамтарсан тандалт судалгааны үр дүн” зэрэг судалгаа, шинжилгээний дүн хэлэлцүүлж байна. Уг хурлын үр дүнд зоонозын халдварт өвчнүүдийн тархвар судлал, молекул биологи, эмнэлзүй, оношилгоо, эмчилгээ, урьдчилан сэргийлэлтийн чиглэлээр салбарын хэмжээнд тулгамдаж буй асуудлуудын талаар хэлэлцэж, шийдвэрлэх арга замыг тодорхойлж, харилцан туршлага солилцохын зэрэгцээ зоонозын халдварт өвчний эрдэм шинжилгээний ажлууд, сүүлийн үеийн ололт амжилтыг харилцан мэдээллэх юм.